Ruška medovnika i divojčica

zrasla ruška medovnika
hladna voda na Dunaj!

več je rušek neg je listja
hladna voda na Dunaj!

njo mi bere divojčica
hladna voda na Dunaj!

njo mi nosi stari majki
hladna voda na Dunaj!

-jočeš, majka, medovniku?
hladna voda na Dunaj!

- ali mene divojčicu?
hladna voda na Dunaj!

rajši oču medovniku
nego tebe, divojčicu
hladna voda na Dunaj!


Varaždinske Toplice, Hrvatsko zagorje, Hrvatska

Dober večer, me ljudi!

- dober vam večer, me ljudi!
daj vam Bog zdravlje, veselje!
Marija stoji na zvezdah
sineka drži na rukah
a sinek drži zlatni križ
na križu je zapisano
se te dvenajst apoštolov
apoštoli su pitali
- de ovo dete rođeno?
- med ovu drobnu živicu
živica ti je spoznala
da je to sami večni Bog


Hrvatsko zagorje, Hrvatska

Dober večer, japica

dober večer, japica
stanite se mamica

to novo leto pofalimo
to dete maleno molimo

da bi nas daruvali
mi bi vam zafalili

japek su se stajali
krajcare su zbrajali

dobri ljudi sim došli
dobre ljude tu našli

fala lepa za vaš dar
koga vam je sam Bog dal


Hrvatsko zagorje, Hrvatska

Zišla nam je Denica

zišla nam je Denica
ne nam je pak to Denica
več je Marija Devica
to novo leto pofalimo
to dete maleno molimo

idemo na doleče
na to malo gmajneče
na to malo gmajneče
to novo leto pofalimo
to dete maleno molimo

na gmajnici crkvica
vu crkvici zlat jantar
vu crkvici zlat jantar
to novo leto pofalimo
to dete maleno molimo

na jantaru Marija
v rukah drži sineka
v rukah drži sineka
to novo leto pofalimo
to dete maleno molimo

sinek drži zlati križ
čim prekriži vas i nas
čim prekriži vas i nas
to novo leto pofalimo
to dete maleno molimo


Hrvatsko zagorje, Hrvatska

Najnička

- dober večer, Najničko!
kaj mi ti sad radiš?
- z levom nogom sinka zibam
z rukami, pak, radim

- tvoj se dragi je oženil
tebe je ostavil
- to, pak, nije istina
snočka je pri meni bil

snočka je pri meni bil
prsten mi je ostavil

- če ne verješ, Najnička
idi na vrh gore
tam buš čula uškanje
preveselo igranje

išla Najnča vu goru
tam je čula uškanje
tam je čula uškanje
preveselo igranje

ona se je vrnula
na žalosno srce
odma zela motiku
nakopa korenje

odma je pristavila
bez vode i granja
počelo zavirati
počel dragi vmirati

njoj doleti deverec
- dober večer, Najnča!
kaj si to napravila?
mladi dragi vmira

- nisam niš napravila
nisam ga ni vidla
- nisam niš napravila
nisam ga ni vidla


Hrvatsko zagorje, Hrvatska

Bele vile i sivi sokol

vijala se sviba vrba
jober grada gospodskoga
bele vile, kolo vile
kolo vile, vino pile
jedna drugi napijala
- nit za moje, nit za tvoje
za gospodu dobro zdravje
Bog nam živi tu gospodu
tu gospodu vu tom gradu!
gospoda se spominala
s kim bi vile daruvala
mali darek, cvancigarek
dober darek, jen škudarek

             # # #

oj, jabuka zelenika
jober grada gospodskoga
z lepim cvetom jodcvetala
dobrim rodom jobrodila
na vse strane po tri grane
na verhuncu po četiri
gori sedi sivi sokol
gori sedi, grada gledi
- Bog nam živi tu gospodu
tu gospodu vu tom gradu!
gospoda se spominala
s kim bi njega daruvala
mali darek, jen krajcarek
dober darek, cvancigarek


Varaždinske Toplice, Hrvatsko zagorje, Hrvatska

Šanti Jure

dobar večer, gospodari
gospodari, gospodinje
gospodari, gospodinje, i dečica i pčelice
fiole, rožice, modre i crlene

je li čujte, je li spiste?
podignite rosne glave
podignite rosne glave
nadeljujte šanti Jure

šanti Jure u zelenju
živi Bože u veselju!
naše glave s cvetjom cvele
vaše duše v raj dospele!

sveti Jura, vitez jaki
bil je prvi med junaki
koplje grabi, pred se meče
i pozoja strašno seče

kad pozoja vumorio
sve devojke otkupio
sve muzike zasvirale
sve devojke zaplesale


Hrvatsko zagorje, Hrvatska

Kaj je tebi, mila?

- kaj je tebi, mila, kaj za pečum stojiš?
kaj za pečum stojiš, sive suze roniš?

pitam tebe, Treza, kod je tvoja steza?
- Moja ti je steza vo široko pole

- pojdi, mila, z menom v pole na šetanje
usrid nam je polja javorek zeleni
tu si, mila, sedi pa mi se rashladi


Hrvatsko zagorje, Hrvatska

Dili, dili, dana

dili, dili, dana, pela baba bana
na jašovi kolci s pisanimi volci

digu, digu, dana, baba je pijana
črno vino pila pa se je napila

digu, digu, dana, baba je pijana
preko grabe skočila, noga ji je počila

ki bi išel gore, bi videl čudo
puru okovanu, gusku osedlanu

zajec Boga moli, lisica ga dvori
krumpač drva kala, zeba podsnihalja

dili, dili, dana, pela baba bana
digu, digu, dana, baba je pijana

dini, dini, duka, baba vozi luka
dili, dili dana, pela baba bana


Hrvatsko zagorje, Hrvatska

Pitam tebe, Maro

- pitam tebe, Maro, gde tvoj par počiva?
- na ratkovskom polu, na kuruzu pazi

- idi, golob, idi, pa mi para streli
prvič puška poči, Joža gori skoči

drugoč puška poči, v Jožefove prsi
on si je zaviknul - Jezuš i Marija!

Jezuš i Marija, pune prsi špriha
- pitam tebe, Maro, jel te boli srce?


Međimurje, Hrvatska

Nakon što se Mara i njen ljubavnik uspješno rješavaju Marinog muža, nju progoni glas koji ju pita da li se kaje. Vjerojatno se radi o Ratkovcu kod Zlatara, u Hrvatskom zagorju.

Janica se šeče

Janica se šeče po visokem gajnku
drobni listek piše svojemu junaku

- oj ti, mladi junak, jel me očeš zeti
jel me očeš zeti ili ostaviti?

- ja bi te rad zeti, al mi majka krati
al mi majka krati, oček ne da znati


Hrvatsko zagorje, Hrvatska

Markec išel v taborec

Markec išel v taborec, domaj stavil Katicu
domaj stavil Katicu, lepu vrtnu ružicu

- oj mamica, mamica, pazite na Katicu
kad bu dete rodila, podajte joj vodicu

kad to dete rodila, majka toči pehara

- oj mamica, mamica, de je naša Katica?
- kaj ti ja znam kam ti je, dišla ti je na pole

Markec zezul čižmicu, pak je vudril narbicu
vrata se otvorila, nutri videl mrtvi dva

- oj mamica, mamica, id'mo mi dva ruže brat
kaj 'mo mrtve kinčali, n' drugi svet otpravljali

kad se majka prignula da otrgne ružicu
Markec spuknul sablicu, 'dseče majki glavicu

- idi glava za glavom, idi duša za dušom
ti fčinila mrtve dvam ja načinil tretjega


Hrvatsko zagorje, Hrvatska

Dobar večer, moja draga

- dobar večer, moja draga
je li čuješ, je li spiš?

je l' te boli tvoja glava?
je l' te boli srce tve?

- ne boli me moja glava
ne boli me srce me

več ne čujem i ne spavam
premišljavam za tebe

- kak ti, draga, možeš biti
dva, tri, dana prez mene

- još nijedna misel moja
nemre biti prez tebe

dej mi ruku, dej mi lice
da ja mogu spavati


Hrvatsko zagorje, Hrvatska

Naj me, golub, starati

naj me, golub, starati
srce moje kalati

kaj sem rekel, pak velim
da te srca ne spustim

ja sem roda takvoga
da ne ljubim sakoga

samo jednu ružicu
junakovu dušicu

kad pogledam oči tve
mam zaigra srce me


Hrvatsko zagorje, Hrvatska

Veseli se stara majka (Delarica)

veseli se stara majka
peljamo ti lefkotico

lefkotico, pomočnico
i vu polju delaricu

i vu polju delaricu
i vu goru kopačicu

i vu goru kopačicu
i vu dolu čuvaricu

i vu dolu čuvaricu
ocu, majki poleščicu



Hrvatsko zagorje, Hrvatska