petak, 30. lipnja 2017.

Svekrva j' svekrvu karala

svekrva j' svekrvu karala
ča joj je to za snahu dala
- oj Bože dragi, oj Bože mili
ča joj je to, ča joj je to za snahu davala

zagledala j' ure va hiži
začela se j' čudno čuditi
- oj Bože dragi, oj Bože mili
ča je to za simo-tamo va vašoj hiži?

zagledala j' metlu va veži
začela se j' čudno čuditi
- oj Bože dragi, oj Bože mili
ča je to za šebrkalo va vašoj hiži?

zagledala j' prelac va hiži
začela se j' čudno čuditi
- oj Bože dragi, oj Bože mili
ča je to za kolotalo va vašoj hiži?


Filež / Nikitsch / Füles, Gradišće, Austrija